الرجولة مواقف قصة فتاه نجت من قارب الموت

سمعنا كتير في الفترة الأخيرة عن قارب الموت وان 90% من الاشخاص اللذين كانوا على ظهر القارب غرقوا. او انقذوا وجزء كبيرة الى اليوم لا يعرف ماهو مصيره. اليوم في قصة روتها وحدة من الصبايا ال كانوا على نفس القارب وحبت تسمي القصة الرجولة مواقف،

اقرأ ايضا : كيف تصبح شخص فاسد في 15 خطوة

فترة ما قبل الحادث

بتقول الصبية انخطبت لشب بألمانيا والحمدلله كانت اخلاقو كتير عالية، وكويسة وابن عيلة ومحترم ضليت اتواصل معو فترة منيحة على الانترنت شب ظريف دمو خفيف حبيتو.

الشب صار يمشي بأوراق الزواج من المانيا ويشتغل على لم الشمل، وانا كان شرطي الوحيد ان اطلع بشكل نظامي من لبنان بالطيارة. غير بهي الطريقة ما كنت وافق. وفعلا الشب بلش بالوراق وحاول كتير يسرع عملية لم الشمل لكن للأسف ما كانت تتيسر، وخبرني ان الوراق رح تطول اكتر من سنتين هون زعلت كتير وانقهرت بس قلي لا تاكلي هم انا رح اتصرف.

وبعد فترة بخبرني بقلي ما عنا غير طريق واحد هو طريق التهريب، بتطلعي على لبنان في مركب. انا اتفقت معو بطالعك وبتوصلي خلال أسبوع على أقرب دولة أوروبية بنزل انا باخدك وين ما بتكوني. انا بصراحة خفت كتير ورفضت الفكرة تماماً. خصوصاً أنى ما بعرف اسبح وبخاف. وكمان سمعت كتير عن ناس ماتو بالبحر. المهم ضلينا كتير نحكي بالسيرة لحد ما اقنعني وقلي ما رح نقدر نستنى سنتين. كتير ناس وصلوا عن طريق هاد المهرب ومافي مخاطرة. قلت يلله بجرب. المهم اقتنعت وخصوصا ان رفيقتي، طالعا كمان لعند خطيبها على نفس المركب بالمرة قلت منطلع سوى

قبل أيام من حادثة غرق المركب ( الرجولة مواقف )

حضرت حالي وطلعت على لبنان انا وصديقتي وصلت المركب هون بنصدم بالعدد الكبير. ال كان على المركب على أساس ان ال طالعين 50 شخص وان الرحلة مأمنه والمركب كتير صغير فكرة يا ربي كيف رح يصل المركب فينا لبر الأمان، هون بعد ما صرنا بالبحر ما في مجال للرجعة.

المهم نحن قاعدين بالمركب بتفاجأ بشب عبيحكي مع رفيقو وبقلو ان امو ماتت وأبو مسافر. وما بيعرف عنو أي شي وان هو اذا اتوفى ما في حدا يقرأ لو الفاتحة حتى وقلو امانة اذا متت قرألي الفاتحة وصاروا يضحكوا.

مشي المركب فينا ولسى ما وصل المركب للمياه الإقليمية بلش يتحرك كتير. وبتجي موجة عالية بتقلب المركب وكم ساعة بلشنا نغرق صرت امسك رفيقتي مظبوط وحاول ان ما اتركها لان ما بعرف اسبح. واخر شي سمعتو كان صوات الناس والأولاد وهنن بصرخوا. واغمى علي من الخوف

صحيت بعد شوي لاقيت حالي مربوطة ببيدون مازوت فاضي حاولت دور على رفيقتي. ما لاقيتها لاقيت الشب ال كان عم يحكي مع رفيقو وهو عم يجرني.

سألت وين رفيقتي قلي ما بعرف ان شاء الله يكون حدا شافها وساعدها. للأسف بهاد اليوم كان الموج كتير عالي وكل ما حاول اتمسك ارجع فلت البيدون واغرق. يرجع الشب يطالعني ويشد ايدي على البيدون بالاخر صار يقلي تمسكي منيح وحاولي ما تفقدي الوعي لان اذا فقدتي الوعي رح تموتي. وشلح قميصو وربطلي ايدي التنين بالبيدون وحاول كتير يحكي معي مشان ما غيب عن الوعي او افقد عقلي.

الوصول لبر الأمان ( الرجولة مواقف )

هون اجت موجة عالية واغمى علي فقت وانا بالمشفى واهلي حولي وامي صارت تبكي. من الفرح هي واخواتي  قالتلي امي ان وقت شافوني كنت مربوطة ببيدونات حولين كل جسمي. سألتن عن الشب شو صار في ما حدا بيعرف عنو أي شي

صرت دور بالمشفى عليه وأسأل عنو بس للأسف ما حدى شافو. بعد يومين بتوصل على المشفى  جثث و كانت جثتو من بيناتن. قلتلن لأهلي بدنا ناخد الشب وندفنو لأن مالو حدى يسأل عليه.

اخي جن جنوو كيف بدنا ناخد الشب بأنو صفة قلتلون منحكي ان هاد خطيبي ومنطالعو لازم ندفنو هو ال انقذني.

المهم اخي دبر الوضع واخدنا الجثة على أساس ان الشب خطيبي. كتبنا بوست على الفيس ان معنا جثة لشهيد مالو حدا غير الله وبدنا نطلع ب جنازتو بوكرة يلي بحب يشارك يتفضل

ونحن بالطريق مرينا على البحر وقلتلن وقفو نزلت من السيارة. وقفت قدام البحر ورميت خاتم الخطبة وطلعت بالسيارة وماحدا حكى معي ولا كلمة. يوم الجنازة اطلعت من البلكون لاقت العالم متجمعة متل البحر صارو يتسابقو مشان يشيلو النعش والكل يترحم على الشب ويقرألو فواتح كانت جنازتو مهيبة. ابكيت كتير من جوات قلبي وقلت كان مفكر ان اذا مات ماحدى رح يطلع ب جنازتو ولا حدى رح يتذكرو، او يقرألو الفاتحة. بس يلي صار ان كل الناس شافت البوست وكل الناس كانت عبتترحم عليه عرفت وقتها ان الشب مو قليل عند ربو وان الرجولة مواقف.